Заев: Eдинственото што можеме да речеме дека го изгубија двете страни е суетата

Добивај вести на Viber

Патриотска должност е на секој политичар, посебно на секој премиер, да се грижи за интересите на граѓаните кои му ја дале довербата и за интересите на државата, изјави премиерот Зоран Заев во денешното неделно интервју за белградскиот весник „Политика“. 

Вели дека е подготвен за лидерство, да води во сите процеси што значат безбедност, зацврстување на меѓународните позиции на Македонија, а и на регионот. 

„Ако добивме потврда, ерга омнес на нашиот македонски идентитет и јазик, ако географската одредница Северна што ја додадовме на нашето име Македонија ни ги отвора патиштата кон ЕУ и НАТО, ако договорот ја става нашата држава Македонија на картата на држави во светот на достоиствено ниво, идентитетски целосно заштитена, за век и веков, ако овој договори значи за Грција спокој и потврда дека немаме никакви територијални или други претензии кон географскиот реон Македонија што е на грчка страна, тогаш единственото што можеме да речеме дека го изгубија двете страни е суетата што ја покажувале до седнувањето на маса на новите политички раководства на државите“- вели Заев, одговарајќи на прашањето кој што добил, а кој изгубил со новото име Република Северна Македонија.

Дополнително, посочува Заев, ние се ослободивме од каменот, го изгубивме каменот што нашата земја 25 години ја влечеше надолу.