Заев: Границата за повисок „персоналец“ не е конечно утврдена

Добивај вести на Viber

Не е точно тврдењето дека границата над која ќе се одначуваат приходите со повисока даночна стапка е 1.000 евра, изјави денеска премиерот Зоран Заев. Тој вели дека износот над кој ќе важи повисоката стапка ќе биде утврден по јавната дебата. Фактор веќе објави дел од работната верзија на законот кој сега  е во подготовка. Според таа, данокот на личен доход или попознат како персоналец од следната година ќе се плаќа со стапка од 10 отсто како и досега на сите бруто примања до 720.000 денари на годишно ниво, додека над 720.001 денар, стапката ќе биде 18 отсто за делот на приходот над овој износ.

„Не е точно тврдењето дека Владата има утврдено дека до 1.000 евра месечно ќе се плаќа 10 отсто данок, а над тој износ да се плаќа поголем данок. Не. Дебатата ќе го одлучи тоа. Буквално ќе ги измериме сите податоци и така ќе ја донесеме одлуката. Правилното оданочување е нешто што е фер. Во секоја земја, ние сме левичари и редот е сите граѓани кои имаат поголеми приходи, поголеми од 1.500, 2.000 3.000 евра да платат поголем данок“, рече Заев.

Сепак според информациите, во овој момент оваа граница е таа што стои во подготвителната верзија на законот. Во неа има и други новини, односно се зголемува данокот на закупите, приходите од интелектуални права, капитални добивки од 10 на 15 отсто. Од 2020 година според тој предлог ќе се даночат и приходите од камати на заштедите ако приходите надминуваат 15.000 денари годишно.