Заев и Ципрас денеска ќе се сретнат и ќе добијат награда во Минхен
Објавено во: Македонија 16 Февруари, 2019
Прв неофицијален состанок по ратификувањето на Преспанскиот договор од страна на парламентите на двете држави ќе имаат македонскиот премиер Зоран Заев и шефот на грчката влада Алексис Ципрас на маргините на 55-тата Минхенска безбедносна конференција.
Двајцата премиери ќе бидат наградени со одличието „Евалд фон Клајст“за нивниот придонес во меѓународен мир и мирно решавање спорови во подоцнежните часови на официјалната вечера која ќе се одржи (21:00 часот) од страна на баварскиот премиер Маркус Гентер како домаќин во чест на учесниците на конференцијата.
- Вечерва, заедно со владината делегација ќе бидеме дел од свечена вечера на која се поканети сите шефови на држави и влади, како и членови на кабинети, што е уште една можност за нови средби и договори за идни иницијативи, најави Заев на својот профил на социјалните мрежи.
Се очекува двајцата премиери и договарачи на Спогодбата од Преспа да одржат и говор против национализмот.
Вчера на почетокот на годинешната Минхенска конференција за безбедност Заев веќе се сретна со претседателот на Црна Гора, Мило Ѓукановиќ, кој му честиташе за потпишаниот Протокол за пристап во НАТО.
Исто така оствари средба и со бугарскиот премиер Бојко Борисов и хрватскиот премиер Андреј Пленковиќ.