Заев ќе бара одговори од Садула Дураки за навивачката прослава во МНТ
Објавено во: Македонија 26 Ноември, 2019
На новинарско прашање дали е утврден кој е организаторот на навивачката прослава на ФК Шкупи во Македонскиот народен театар и согласно со тоа да биде утврдена одговорноста за штетите предизвикани од навивачите, премиерот Зоран Заев рече дека денеска на владина седница ќе се разгледаат информациите и ќе се донесе заклучок.
Заев рече дека поврзан со организацијата е и министерот за политички систем и односи меѓу заедниците Садула Дураки, од кого исто така ќе бара одговори.
- Денеска на седница на Влада очекувам информација од Министерството за култура и од потпретседателот на Владата и ресорниот министер за политички систем за да можеме да ја информираме јавноста за тоа како се случил настанот, кој е одговорен, дали има штети - нема штети., рече Заев.
Шефот на македонската Влада додаде дека денеска на седницата ќе пристигне извештајот за тоа што всушност се случило и да се види дали имало вандализам, па според тоа и да се донесе одлука дали ќе се осуди настанот.
Премиерот вчера рече дека прославата на навивачката група „Шверцери“ од Чаир била „протната“ како дел од одбележувањето на Денот на албанската азбука во МНТ.