Заев: Ќе го зголемиме нашето учество во мисиите во Ирак и Авганистан

Добивај вести на Viber

Премиерот Зоран Заев на денешната заедничка прес-конференција со генералниот секретар на НАТО, Јенс Столтенберг, во Владата на Македонија објави дека ќе биде зголемено военото присуство во Ирак и Авганистан.

„Спремни сме за обврските што ни претстојат. Владата е цврсто решена за 0,.2 проценти да го зголемува воениот буџет секоја година и до 2024 тој да изнесува два отсто од БДП за модернизација на армијата и индивидуалните способности. Војската во иднина ќе го зголеми своето учество во мисиите и ќе помагаме во НАТО-фондовите во Ирак и Авганистан, односно во борбата против ИСИС и ДАЕШ“, рече Заев.

При посетата на Северноатлантскиот совет на НАТО во Скопје тој истакна дека Македонија веќе има голем бенефит од членството во Алијансата.

„Странските инвестиции се три пати поголеми од просекот од последните години, невработеноста е намалена за 7,5 проценти, платите се зголемени за 6,1 посто. НАТО носи економски прогрес“, наведе Заев.

Министрите во Владата кои се членови во НАТО-комитетот ќе рефереираат пред Столтенберг подетално за сработеното во нивните ресори во поглед на приклучувањето кон НАТО. 

„Македонија е мала земја но сериозен партнер на сите земји членки во НАТО“, додаде Заев.

Столтенберг, исто така, рече дека сите можат да ги видат бенефитите од членството на Македонија во НАТО и се поголемите инвестиции.