Заев: Ќе има одговорност и соодветна казна за бруталноста на полицајците во Битола
Објавено во: Македонија 25 Септември, 2020
Премиерот Зоран Заев ја осуди полициската бруталност евидентирана во видео кое вчера се споделуваше на социјалните мрежи а на кое се гледаше како припадници на МВР тепаат Ром во Битола.
„Бруталноста од страна на полициски службеници врз граѓани Роми, што ја видовме вчера во видеото на социјалните мрежи, е за најсилна осуда.
Таквото однесување е срамно за полицијата, ја заслужува осудата која пристигна од јавноста.
За поздравување е што Одделот за внатрешна контрола, криминалистички истраги и професионални стандарди при Министерството за внатрешни работи го утврди идентитетот на учесниците на овој исклучително немил настан, и очекувам дека многу бргу, по утврдените околности да следува целосна одговорност и соодветна казна на сите инволвирани во случајот.
Вложивме многу во менувањето на ликот и однесувањето на полициските службеници и нема да дозволиме, дури и вакви изолирани случаи, да поминат без одговорност и соодветна казна“, напиша Заев на Фејсбук.
Претходно, на социјалните мрежи се појави видео на кое се гледа како униформирани полициски службеници тепаат маж. Според она што е споделено на социјалните мрежи се работи за припадник на ромската етничка заедница и се бара одговорност од полицајците за бруталното постапување.