Заев ќе закочи со оптимизмот, а Жбогар вели дека ЕУ повеќе нема да дава лажна надеж
Објавено во: Македонија 22 Октомври, 2019
Премиерот Зоран Заев ќе биде помалку оптимист, а ЕУ ќе се воздржи од давање лажна надеж. Ова е епилогот по извисувањето на Македонија во очекувањата да добие датум за преговори од Брисел изминатиот викенд.
Евроамбасадорот во Скопје, Самуел Жбогар, во своето интервју за МИА вели дека ЕУ го разбира разочарувањето на граѓаните и на политичарите од одлуката на Европскиот Совет во Брисел, но дека останува посветена на Северна Македонија и на регионот, признавајќи оти треба да се извршат реформи и во самиот процес на носење одлуки внатре во самата ЕУ.
Жбогар на прашањето дали во мај на Самитот во Загреб очекува земјава да добие датум, вели дека сега ЕУ треба да се воздржи од ветувања.
-Треба да се воздржиме од ветувања, бидејќи ветивме во јуни лани и во јуни 2019 и сега во октомври и сега е најдобро да се воздржиме од давање ветувања за датуми, но затоа треба да се фокусираме на правењето на вистинските промени, изјави Жбогар во интервјуто за МИА.
Од друга страна истовремено и премиерот Заев во своето синоќешно интервју за „360 Степени“ рече дека сега е порезервиран на информациите дека постои иницијатива од Италија, да се врати прашањето за Северна Македонија на дневен ред веќе во ноември, на Советот за општи работи.„Сега јас малку ќе закочам со мојата надеж и оптимизам. Нели бев најголем оптимист. Ние да си работиме, а тие дај боже побрзо да одлучат, да ги отворат поглавјата за нас, односно да ја донесат одлуката за почеток на преговорите“, рече Заев.