Заев на средба со бугарскиот државен врв - ќе има ли деблокада на евроинтеграциите?
Објавено во: Македонија, Балкан 19 Јуни, 2017
Владина делегација на чело со премиерот, Зоран Заев утре и задутре ќе престојува во работна посета на Република Бугарија.
Од Владата информираат дека првата официјална средба на премиерот Заев со претставници на државниот врв на Бугарија е предвидена за утре, на 20 јуни, во 10.50 часот.
Сите овие дипломатски активности на новата македонска Влада се во насока на решавање на проблемите со соседите, како предуслов за деблокирање на евроатлантската интеграција на Македонија.
Работните групи на двете држави во изминатиов период работеа на подготовки за средбите и, според неофицијални сознанија, несогласувањата околу толкувањата на историјата и околу заедничко одбележување на важните датуми за Скопје и за Софија и понатаму се актуелни, но од двете страна се очекува позитивен импулс.
Големи очекувања од средбата има и во Бугарија. Академик Стефан Воденичаров во интервју за БГНЕС изјави дека работата на двајцата премиери треба да ја отвори вратата на ЕУ и на НАТО за Македонија.
И бугарскиот премиер Бојко Борисов, по изборот на новата македонска Влада, изрази уверување дека Софија и Скопје ќе работат за зацврстување на добрососедските односи и за приближување на Македонија кон ЕУ и НАТО.