Заев од Пробиштип: „Кранфилд Фаундри“ ќе дава плата повисока од просечната
Објавено во: Македонија 11 Декември, 2019
Почна со работа новата фабрика во Пробиштип, инвестиција вредна 17 милиони евра. Станува збор за леарница на железо, која по европски еколошки стандарди и со високо-автоматизирана технологија треба да изработува делови за автомобилската индустрија.
„Кранфилд Фаундри“ во оваа почетна фаза има 58 вработени, а со проширување на инвестицијата во наредниот период се очекува бројот на вработени да изнесува околу 300.
Околу 50 работни места се резервирани за лица со високо образование.
Од менаџментот на компанијата велат дека следната инвестициска фаза ќе овозможи производство на делови за автомобилската индустрија.
Премиерот Зоран Заев нагласи дека оваа инвестиција е заедничко дело на двете влади, претходната и сегашната.
Фабриката, според него, е сериозна шанса за граѓаните, за младите од општината, кои со овие перспективи на „Кранфилд Фаундри“ добиваат реални можности да се школуваат, да се остручуваат и да се вработат дома, во своите родни места.
„Уште една голема причина за тоа е и просечната плата во „Кранфилд Фаундри“ која денеска е повисока од просечната плата на државно ниво со потенцијал за уште поголем раст“, нагласи премиерот Заев, и додаде дека и оваа фабрика е резултат на економските политики на Владата кои придонесоа за пораст на бруто домашниот производ од 3,6 отсто, и за намалувањето на невработеноста во третиот квартал на 2019 година на рекордно ниски 17,1 отсто“, рече премиерот.
За вицепремиерот Анѓушев е најважно што производството главно е извозно ориентирано, а го помага и развојот на локалната економија.
Инвестицијата се простира на површина од околу осум хектари, а се состои од производствен погон и административна зграда на вкупно 15 илјади метри квадратни.