Заев: Опозицијата ќе има мнозинство во контролата на изградбата на Клиничкиот центар
Објавено во: Македонија 04 Март, 2021
Премиерот Зоран Заев денеска на официјалниот почеток на изградба на далекуводот Штип – Овче Поле рече дека власта се договорила со опозицијата таа да го има мнозинството во комисијата за контрола и надзор на изградбата на новиот Клинички центар во Ѓорче Петров само за да може да се одблокира донесувањето на законот.
„Договорено е опозицијата да има мнозинство во контролата и надзорот на Клиничкиот центар, како и договорено е да има мнозинство во проектната единица за изведбата. Овој Клинички центар ќе чини 500 милиони евра, а ако го донесеме овој закон, од ЕУ може да добиеме грант за негова изградба од дури 250 милиони евра, рече Заев.
Откако ја доби довербата од 62 пратеници вчера во Собранието, премиерот најави дека приоритетни за гласање ќе бидат Закон за енергетска ефикасност со кој се предвидени 25 милиони за државни и 15 милиони евра за општински проекти.
- Треба да се изгласаат и законите за 50 милиони евра од Светска банка за откупни пунктови во земјоделието, 70 милиони евра за трамвај на тркала за Скопје, што има тука опозиција и власт да се натегаат, како и за Петиот пакет на помош во корона-кризата, рече Заев.