Заев по резултатите објавени од „Херитиџ“: Продолжува борбата против сивата економија
Објавено во: Економија 13 Септември, 2019
Откако Македонија се најде на 33.место со 71,1 процентни поени како економски најслободна земја на Балканот, според светскиот годишен индекс објавен од Фондацијата Херитиџ, премиерот Зоран Заев денеска рече дека мерките против сивата економија ќе продолжат.
– Мерката „Мој ДДВ“ е борба против сивата економијата, евазија на данокот на додадена вредност. Намерата е да ги легализираме и парите во кеш што ги даваат голем дел од фирмите на полулегален дури и на законски начин. Сите овие мерки што ги развиваме како Влада се буквално борба против сивата економија, која според нашите проценки е меѓу 20 и 30 отсто, што е многу. Така што земја која има аспирации да биде европска, мора сериозно да се бори не само затоа што буџетот губи, туку затоа што губат и граѓаните, односно сите кои се на легалниот пазар, наведе Заев пред отворањето на Балканскиот претприемачки самит во Скoпје.
Шефот на македонската Влада смета дека е добро тоа што државата е подобро рангирана на листата на „Херитиџ“ кога станува збор за економските слободи, но дека како земја аспирант за членство во ЕУ, предизвиците против сивата економија допрва следуваат. Според Заев, голем дел од политиките што ги спроведува Владата се темелат на сузбивање на нелегалната економија.