Заев пред 171-та седница на владата во Куманово: Со овие седници сме поблиску до граѓаните

Добивај вести на Viber

Сакаме од градоначалниците на овие општини најнепосредно да ги добиеме информациите од интерес на граѓаните,  изјави премиерот Зоран Заев, пред одржувањето на редовната 171 седница на Владата во Куманово. 

Вели дека од тие информации, од она што го очекуваат граѓаните од овие општини и од овој регион ги утврдат идните политики и одлуките за проекти кои може да ги реализираат општините со поддршка на централната власт.

Министерот за транспорт и врски Горан Сугарески и директорот на Јавното претпријатие за државни патишта Зоран Китанов, извршија увид во работите на рехабилитацијата на регионален пат Куманово - Св. Николе. 

Министерот за здравство Венко Филипче ја посети Општата болница во Куманово за да ја промовира новата опрема во болницата и да ги договори идните активности за доопремување со апарати за најсовремени здравствени услуги за граѓаните. Министерот Филипче се сретна и со пензионерите со кои разговараше за укинувањето на квотите за лекови за да добие од прва рака информација дали мерката ги исполнува очекувањата на граѓаните.

Во рамки на теренските настани, министерот за земјоделство, шумарство и водостопанство Трајан Димковски, посети една локална компанија за месна индустрија  како една од корисниците на ИПАРД програмата. Неговата цел беше да ги охрабри сите други мали и средни компании да продолжат да аплицираат за ИПАРД средствата.

Министерката за труд и социјална политика Мила Царовска, се сретна со корисниците на социјална пензија од Куманово и регионот. Социјална пензија користат над  4 илјади возрасни лица во земјата.