Заев: Прославата во МНТ и не била баш културна манифестација

Добивај вести на Viber

Ако во театарот има штети, тие мора да се платат, вели премиерот Зоран Заев, за настанот во петокот во кој навивачката група Шверцери“ славеше годишнина на фудбалски клуб во Македонскиот народен театар, што се смета за недолично однесување. 

„Секој вандалски чин е за осудување, тука нема дилеми. Мене ми кажаа дека има и втор дел, а намерата била за млади луѓе. Но, испадна дека второт дел не била баш културна манифестација. Мора да има одговорност за кршење на инвентарот и мора да се надоместат штетите“, истакна Заев.

А пратеникот Артан Груби, за кој претходно директорката на театарот наведе дека тој бил координатор на настанот и кажал дека ќе има само проекција на документарен филм за 30 години постоење на Шверцери, смета дека реакциите се апсурдни.

За порталот Плусинфо тој изјавил дека дивеење е упадот, тепањето и скандирањето во Собрание на 27 април, а не прослава на навивачи, каде што се очекува скандирање, пеење, но не и вандализам, кој што би го осудил во секој момент.

„Сметам дека реакциите се апсурдни, лицемерни и преставуваат класична намерна политичка злоупотреба на настан во функција на предизборна пропаганда. Јас не сум организатор на настанот, но мора да истакнам дека театарот му припаѓа на народот, не е ВМРОвски, СДСМовски, па ниту ни на фелата, граден е со наши пари, со парите на граѓаните, а не со парите на ВМРО, ниту на фелата, и им припага на граѓаните. 20- годишината беше одбележена во Албанскиот театар пред 10 години со прикажување на документарец, исто како и 30-годишината во МНТ, каде што присуствуваа фудбалски ветерани, тренери, Албанци, Македонци и други, на кои им беа доделени благодарници од страна на организаторите, спонзори, градоначалници, и други. Секоја чест за професионалноста на вработените во театарот каде што се одржуваат безброј различни настани“, рекол Груби. 

Откако се објави видеото за настанот, не стивнуваат реакциите, а дел од јавноста вели дека треба да се бара одговорност како се дозволило такво недолично однесување.