ЗАЕВ: СИГУРНИ СЕ ТРИ ПРАТЕНИКА ПЛУС, ОЧЕКУВАМЕ И ПОВЕЌЕ - вети правда и економија за граѓаните
Објавено во: Македонија 16 Јули, 2020
Можемееееее.
Вака, проследен со громогласен аплауз од членовите и симпатизерите, лидерот на СДСМ Зоран Заев ја прогласи победата на овие парламентарни избори.
Рече дека коалицијата Можеме има над три пратенички мандати, убедлива и стабилна предност.
Има можност за уште еден до два пратенички мандати повеќе од овој резултат.
Нашата коалиција е победничка на овие парламентарни избори, нагласи Заев.
„Граѓаните гласаа за сигурност, за економски патриотизам, за ред и правда. Патот напред е потврден, на опасноста и кажавме јасно не“, рече Заев.
Вели дека изборите биле мирни и демократски.
Им се заблагодари на сите што беа активни учесници на македонската демократија.
„Ние сме победници, имаме и зошто да се радуваме, денеска победи иднината, победи напредокот. Стара поговорка вели, како ќе си постелеш, така ќе легнеш. Така сите учесници на овие избори добија порака од граѓаните.
Концептот на интеграција го порази концептот на изолација, а концептот едно општество за сите го порази лажниот патриотизам“, рече Заев.
Најави дека следуваат уште поголеми плати, поголемо чистење на воздухот, еко држава, поддршка за граѓаните, и следуваат преговори со ЕУ.
„И конечно народе мој следува правда“, рече Заев, проследен со силна поддршка.
Рече дека правдата ја бара тивкиот глас на оние многумина што не излегоа да гласаат.
Тој го чул нивниот глас и им вети правда на овие граѓани, за тоа ќе работи макотрпно со својот тим во наредниот мандат.
„Економија, правда, економија, правда“, вети Заев.