Заев: ВМРО-ДПМНЕ е пред одлука за бојкот на пописот
Објавено во: Македонија 29 Јануари, 2021
Премиерот Зоран Заев денеска во Собранието на координативна средба за успешно спроведување на престојниот попис рече дека ВМРО-ДПМНЕ е пред одлука да ја бојкотира статистичката операција. Според Заев, тој повик може ќе биде во завиена форма, но може да биде и директно барање од членството да не се попишува.
„Сакам да ја адресирам најавата за бојкот на пописот од страна на опозицијата. Тоа е најлошата одлука што може да ја донесе еден политички субјект за внесување на конфузија и сериозна штета. Повикот за бојкот може да биде лажно спакуван или да биде повик за минирање. Но со неспроведувањето на пописот сме единствената земја која не може да планира каков било план за економски, образовен и културен развој. Ќе бидеме земја која не поседува податоци да ги испланира следните пет или 50 години“, рече Заев.
Во обраќањето пред градоначалниците и пред директорот на Заводот за статистика додаде дека ниту еден инвеститор нема да покаже интерес да инвестиора кога ќе види дека ги немаме основните податоци.
„Ја користам оваа можност уште еднаш да ја повикам најгоплемата опозициска партија да се приклучи. Ова е операција која треба да даде одговорн и на која возраст ни е населението, со какво образование и квалификации ни е. Ќе дознаеме колку од зградите ни се енергетски ефикасни, колкумина се греат на дрва, на парно, на струја. Тие се од значење и за локалните власти за развојот на заедниците.“, додаде премиерот.