Заев во посета на ТЕЦ Осломеј: Шампиони во регионот во раст на обновливи извори
Објавено во: Економија 15 Октомври, 2021
„Северна Македонија е на врвот, меѓу шампионите во регионот по раст на обновливи извори на енергија. Само за минатата година го зголемивме производството на енергија од обновливи извори на 827 мегавати, што претставува раст од 10,1 проценти и е во рамки на светскиот просек на зголемување од 10,3 отсто, според извештајот на „Балкан грин енерџи њуз“, рече премиерот Зоран Заев за време на посетата на ТЕЦ „Осломеј“ каде што е во тек изградбата на првата фотоволтаична електрана од 10 мегавати во сопственост на „ЕСМ“.
Во Термоелектраната во Осломеј во Кичево се одвиваат градежни активности за изградбата на првата фотоволтаична електрана од 10 мегавати во сопственост на „ЕСМ“. Договорите од една страна се потпишани од „ЕСМ“, како јавен партнер, и од друга страна со „Фортис енерџи“ од Турција во едната електрана, а во другата со „Солар про“ од Бугарија. Приватните партнери на „ЕСМ“ ќе му исплаќаат надоместок за јавното приватно партнерство во износ соодветен на 18% и 18,50% од произведената електрична енергија за час.
„Пресметките покажуваат дека заработка на државата би се движела околу 1,5 милиони евра годишно. Дополнително инвеститорите имаат обврска да земат по 1 вработен по мегават односно 100 вработени од Осломеј за трајно да ги обезбедиме тие наши сограѓани. Во моментот се прави студија за праведна транзиција, во која треба да бидат направени сите анализи за можностите и иднината на постојните вработено. Ова е показател дека се грижиме за сите и дека се бара решение за сите“, додаде Заев.
Генералниот директор на АД „ЕСМ“ Васко Ковачевски изјави дека станува збор за иницијатива со која значително ќе се зголеми производството на електрична енергија од обновливи извори, особено од сонцето.
„Термоелектраната „Осломеј“ не беше во редовна работа со години и сега во делот каде што е завршена експлоатацијата на јагленот се почна со инвестиции што ќе бидат не само во интерес на енергетскиот сектор на нашата држава, туку и во интерес на сите граѓани што живеат во Кичево и околината“, истакна Ковачевски.
Во моментов се врши селектирање на потребните кадри од РЕК „Осломеј“ и нивна преквалификација за работа во фотонапонската електрана, како и за потребите на поголемата фотонапонска електрана од 100 MW која ќе се гради како јавно-приватно партнерство.