Заев за субвенционирање на гарантирана минимална плата, СДСМ не отстапува од намалување во администрацијата
Објавено во: Економија 26 Март, 2020
Претседателот на СДСМ Зоран Заев на состанокот со своите колеги од ПЕС (Партија на европските социјалисти) преку видео-конференција најави дека за време на кризата на сите вработени во приватниот сектор ќе им се гарантира минимална плата субвенционирана од државата, како и даночни олеснувања за сите компании зафатени од кризата, пренесе МИА.
На состанокот Заев ги презентирал мерките кои владата предводена од СДСМ ги има преземено до овој момент и мерките кои ќе се преземаат во зависност од тоа како ќе прогресира ситуацијата со коронавирусот.
Инаку Коста Костадинов, портпаролот на СДСМ, денеска порача дека сите пари од намалувањето на платите на министрите, раководителите, директорите, градоначалниците , како и тие пари кои ќе се заштедат од намалувањето на платите на вработените во јавниот сектор за април и мај ќе одат во посебен фонд.Костадинов побара од Владата за април и мај на сите фирми погодени од корона-кризата да им исплати по една минимална нето-плата по вработен. На фирмата ќе остане обврската да им го исплати остатокот и придонесите.