ЗАЕВ ЗАМИНУВА ОД КАБИНЕТОТ УТРОВО: Примопредавање, па Ковачевски ќе носи енергетски одлуки
Објавено во: Македонија 17 Јануари, 2022
Зоран Заев заминува, во премиерското столче ќе седне Димитар Ковачевски. Од Владата соопштија дека денеска со почеток во 09:00 часот ќе се случи примопредавање на функцијата и на кабинетот помеѓу досегашниот премиер Зоран Заев и новоизбраниот премиер.
Новата Влада беше избрана вчера во Собранието, а Ковачевски рече дека легитимитетот на Владата е неспорен и со зголемената поддршка на мнозинството одржлив во следните две и пол години.
„Јасно и гласно потврдувам дека избори ќе има, но, во 2024 година. Дотогаш ќе работиме посветено на унапредување на економијата и квалитетот на животот на граѓаните на државата. Со работа започнуваме веднаш. Веќе на првата седница на Владата отпочнуваме со носење на решенијата за енергетската криза. Утре ќе остварам и средба со новата германска министерка за Европа со која ќе разговарам за забрзување на евроинтеграциите. Веќе во вторник на мое големо задоволство ќе бидам домаќин на новиот бугарски премиер Кирил Петков со кого сакаме да воспоставиме нова соработка базирана на почитување, поддршка и зачувување на македонскиот идентитет, рече вчера Ковачевски.
Најави дека Владата веднаш потоа ќе продолжи со решенија за зголемување на пензиите и за поддршка на куповната моќ на граѓаните. Ќе се посветиме, додаде тој, на ефикасна реализација и стимулирање на домашните јавни капитални и домашните и странски приватни инвестиции. Ковачевски нагласи и дека секој министер во својот ресор и целата Влада имаат јасен и прецизен план за реализирање на поднесената програма со рокови и индикатори за следење на реализацијата и ефектите.
-Најавив и нудам партиципативност и уште еднаш ја повикувам целата опозиција за заедничка работа за клучните прашња. Нашите граѓани се обединети во барањата за подобар живот. За тоа единствено ќе работиме и бараме сите да ни се приклучите за да ја реализираме таа цел. Да престанат политичките, етничките и сите други поделби и заедно да работиме за решавање на клучните прашања, рече Ковачевски.
Побара да се тргнат личните и теснопартиските интереси на страна, бидејќи, како што нагласи премиерот, сега повеќе од било кога мора да соработуваме во интерес на граѓаните.