Захарова: Решението за името треба да се потпира на широк општествен консензус
Објавено во: Македонија, Свет 18 Јули, 2018
Договорот за решавање на спорот за името меѓу Македонија и Грција не се потпира на широк консензус.
Ова денеска го изјави портпаролката на руското Министерство за надворешни работи, Марија Захарова.
Таа на својот Твитер профил објави дека Договорот наместо да предизвика обединување, предизвикува раскол во двете земји.
„Решението за името треба да се потпира на широк општествен консензус и беспрекорна уставна основа. Преспанската спогодба не е таков случај. Таа само предизвика дополнителен раскол и во Грција и во Република Македонија“– објави Захарова на Твитер.
Захарова минатата недела изјави дека стремежот на НАТО механички да се прошири во Европа не може да ја зацврсти безбедноста, а форсираното вовлекување на Македонија во тој воен блок, само потврдува дека „политиката на отворени врати“ станува самата на себе цел.
„Станува збор, всушност, само за едно – за постигнување воена предност“ – изјави Захарова на 12 јули, кога Македонија и официјално доби покана за членство во НАТО.
Таа тогаш во Москва рече дека форсираното вовлекување на Македонија во НАТО претставува инструмент за освојување на геополитички простор.
Шефот на руската дипломатија, Сергеј Лавров на почетокот на годината изјави дека Руската Федерација најверојатно ќе го признае кое било име на Македонија, кое ќе го договорат Скопје и Атина.