ЗАНАЕТЧИСКИОТ СЕКТОР СО ОГРОМНИ ЗАГУБИ: Пред затворање голем број бизниси

Добивај вести на Viber

Занаетчискиот сектор во земјава е еден од најпогодените поради пандемијата со коронавирусот, предупредуваат од Занаетчиската комора, од каде нагласуваат дека е доведена во прашање егзистенцијата на цели семејства, бидејќи нема никаква побарувачка на занаетчиски производи и услуги. Во занаетчискиот регистар се регистрирани занаетчии кои функционираат како самовработени лица и занаетчии кои имаат вработени. Станува збор за околу 5.800 занаетчии и околу 3.300 вработени.

– Со досегашните мерки од Владата, занаетчиите не се опфатени во ниту една мерка. Затоа, проблем имаат оние кои вршат самостојна дејност, самовработени лица, затоа што немаат обврска да плаќаат плата за себе, туку да плаќаат придонес за задолжително пензиско и здравствено осигурување – изјави денеска претседателот на Занаетчиската комора, Никола Петров.

Од Занаетчиската комора сметаат дека доколку се донесе најавената мерка за субвенција на плата, а обврската за придонеси падне на работодавачот, околу 5.800 занаетчии нема да бидат опфатени со мерките, па нема да бидат субвенционирани, ниту со плата, ниту со придонеси.

Претходно, Занаетчиската комора, како што самите велат, дала предлог до Владата со анти-кризни мерки, но, се уште немаат одговор, а предлагаат во мерката за субвенционирање на платите и придонесите да се предвидат и занаетчиите за време на кризниот период.

Доколку не се прифати ова, појаснуваат оттаму, може наскоро да дојде до затворање на бизнисите и отпуштања.