Завршува конкурсот на СДСМ за кандидат за претседател на државата

Добивај вести на Viber

Денеска завршува конкурсот на СДСМ за пријавување на кандидати за претседател на државата, но останува да се види колку тоа ќе има влијание на конечниот избор, бидејќи во меѓувреме владините коалициони партнери се вратија на преговорите за консензуален избор.

Двајцата партиски лидери на СДСМ и на ДУИ - Зоран Заев и Али Ахмети вчера се состанаа во клубот на пратеници каде беше решено повторно да му се даде шанса на избор на заеднички надпартиски кандидат кој ќе биде прифатлив и за македонскиот и за албанскиот електорат, но и за другите етнички заедници.

Заев најави дека како ќе поминува времето до крајот на неделата така на површина ќе испливуваат имињата на кандидатите кои ги задоволуваат консензуалните критериуми, а засега, според премиерот, најсериозни се пет кандидати кои имаат најголеми шанси.

Кој ќе ја претставува владејчката партија во претседателската трка ќе се знае на конгресот закажан за 3 март. Единствен кој досега има поднесено кандидатура за претседател од СДСМ е поранешниот амбасадор Ѓорѓи Филипов.

Шестите претседателски избори беа распишани од претседателот на Собранието, Талат Џафери на 8 февруари. Првиот изборен круг е закажан за 21 април, а вториот ќе се одржи на 5 мај.