Зекири: Нема никакви опасности од федерализација
Објавено во: Македонија 23 Октомври, 2016
Нема никакви опасности од федерализација. Македонија е едно општество и ќе биде едно општество, еднакво за сите граѓани, за тоа се залага СДСМ, изјави Мухамед Зекири од СДСМ во неделното интервју на Радио Слободна Европа.
Според него, нема опасност од федерализација на земјата и вели дека ВМРО-ДПМНЕ нема што да понуди на граѓаните, и затоа се занимава со вакви теми.
„Работата со двојазичноста е решена уште со Рамковниот договор, тоа е решено во Уставот на Република Македонија. Претседателот на СДСМ не кажа ништо друго освен тоа што е предвидено во Уставот на Република Македонија. Друг е проблемот што ВМРО-ДПМНЕ, заедно со нивниот коалициски партнер ДУИ, ја користеа таа тема за да подгреваат етнички тензии. Ништо не треба друго, освен да се почитува Уставот. СДСМ не кажува ништо дополнително од тоа, освен што предвидува Уставот. ВМРО-ДПМНЕ и ДУИ за таа работа беа махери – да подгреваат етнички тензии и тие се уште мислат да играат на националистичка карта. Може да замислете какви беа реакциите во нашето општество во 2001 кога се потпишуваше Охридскиот договор. Демек ако се потпише тој договор - готово ќе ја снема Македонија. Еве кај сме. Македонија е и таква ќе остане, значи нема никакви опасности од федерализација“ - вели тој.
Зекири додава дека СДСМ е во коалиција со граѓаните и ќе продолжи да биде, а во тек се преговори со традиционалните коалициски партнери. Објаснува дека СДСМ е отворена за соработка и со помалите опозициски албански партии.