Земја помала од Македонија бара 20.000 работници од странство
Објавено во: Економија, Балкан 04 Јануари, 2019
Повеќе од 20.000 работници од странство ќе „увезе“ годинава Црна Гора.
Сепак ова е помалку од кадарот кој им беше потребен минатата година.
Квотата за привремен престој и работа на странци во земјата за 2019 година, со одлука на Владата, е утврдена на 20.454 дозволи. Тоа е за 2.371 помалку од лани.
5.000 дозволи се во резерва кај Министерството за труд за дополнително распоредување, во текот на годината, во согласност со потребите на пазарот на трудот.
За вработување на странци, утврдени се 11.902 дозволи, а за сезонско вработување 3.552. Само за три сектори, градежништво, туризам, угостителство и трговија се планирани 15.454 дозволи за странски работници.
Скоро 5.000 дозволи се наменети за хигиеничари, помошен персонал во домаќинствата, хотелите и деловните простории и за помошници во подготовка на храна. За занаетчии и сродни занимања се предвидени 5.408 работни дозволи, а 2.068 за работници во секторот на услуги и трговија.
Квотата за 2018 година беше 23.185 дозволи. Во периодот од 1 јануари до 10 декември 2018 година се издадени 24.598 работни дозволи за работа и вработување на странци во Црна Гора, што е за 21,1 отсто повеќе во однос на истиот период од претходната година, кога биле издадени 20.317 работни дозволи.
Вработување на странци во Црна Гора во 2017 и 2018 година покажува дека не е доволно искористен потенцијалот на домашната работна сила.
Претходните години во сезона земјата имала потреба од 15.000 до 18.000 сезонци.Македонските градежници се барани таму уште од 2014 година.
фото РТВ.рс