Земјотресот во Албанија урна 50 куќи
Објавено во: Балкан 24 Септември, 2019
Во Албанија од земјотресот оштетени се 1.528 објекти, а целосно урнати се 50 куќи претежно во руралните средини.
Директорот на Агенцијата за справување со кризи, Хаки Чако, гостувајќи во емисијата „Опињон” на Њуз 24 изнесе податоци од последниот извештај за последиците од земјотресот што ја погоди Албанија.
„Распукани се 160 станбени згради, 34 училишта, 13 универзитети, два моста, две електрични кабини, две возила и еден магацин“ – истакна Чако, дополнувајќи дека најпогодени се подрачјата на Драч и Тирана.
Во градските стадиони во Драч и Каваја поставени се војнички шатори за оние чии домови се оштетени. На располагање ќе бидат и дел од ученичките домови.
Министерството за образование и наука соопшти дека по денеска почнува наставата.
Регистрирани беа повеќе од 340 дополнителни земјотреси во Албанија за едно деноноќие.