Жерновски се прости од МНР и Владата: Му благодарам на Заев за шансата
Објавено во: Македонија 24 Септември, 2020
Андреј Жерновски, досегашниот заменик-министер за надворешни работи, на Фејсбук се прости од МНР и Владата, откако и официјално заврши неговата функција. Вчера во Собранието беа изгласани новите заменици-министри по предлог на Владата, а Жерновски ќе биде заменет од Фатмире Исаки, која ќе му биде помошничка на новиот шеф на македонската дипломатија Бујар Османи.
„Некако симболично, со завршување на летото заврши и мојот мандат во Министерството за надворешни работи.
Ми беше чест и задоволство да работам во македонската дипломатија во периодот кога ги постигавме најголемите успеси на надворешен план: полноправното членство во НАТО и одлуката за почеток на преговорите со ЕУ.
МНР е куќа во која работат врвни професионалци и дипломати, посветени на интересите на својата држава. Со таквата одговорна мисија, тие градат државност промовирајќи ги и афирмирајќи ги националните вредности и интереси.
Убеден сум дека успесите на надворешен план ќе продолжат и дека новото раководство на нашата КУЌА ќе соработува успешно како што тоа го правевме министерот Димитров и јас.
Благодарност, пред се’, за поддршката и одличната соработка со премиерот Заев, кој ми ја додели довербата да бидам дел од Владата со која раководи. Времето и историјата допрва ќе ги потврдат неговите и успесите на македонската држава на надворешен план“, напиша Жерновски на Фејсбук.
Поранешниот градоначалник на Центар му се заблагодари и на претходниот министер за надворешни работи Никола Димитров и до вработените во министерството, а на Османи Исаки им посака личен и зеднички успех.