ЗНМ: Дел од мерките во планот на Владата се проблематични
Објавено во: Македонија 25 Јули, 2019
Првичната оценка за чекорите кои Владата ги промовираше во Предлог планот против ширење на дезинформации е дека содржи точки поради кои изразуваме загриженост, стои во денешната реакција до Здружението на новинари на Македонија. Се апелира в насока на исклучување на сомнежи за злоупотреба на обврската на Владата да ја гарантира слободата на изразување, процесот на консултации за овие теми да биде максимално инклузивен и транспарентен од самиот почеток.
„Освен тоа, Владата треба да знае дека дефинирање на професионални стандарди и оценката за тоа дали некој новинар или медиум е етичен, може да ги прави исклучиво новинарскиот еснаф и јавноста, а не владина институција или каква било работна група во рамки на Владат, велат од ЗНМ.
Ја охрабруваат Владата дза планот да направи напор за одбранбен механизам внатре во институциите, преку креирање на протоколи и обуки за државните службеници.
„Од друга страна, со загриженост ги проследивме дел од проактивните мерки и тоа особено оние кои имплицираат на платени кампањи во приватните медиуми, најавата за ко – регулација, воведување на критериуми за акредитирање на медиуми кои ќе имаат право да ги следат владините настани во согласност со стандардите на новинарската професија, како и формирање на акциска група за борба на дезинформации со проблематичен состав и улога, стои во соопштението.
ЗНМ е на став дека недореченоста на овие предлог мерки може да се толкува како обид за ограничување на слободата на изразување, а со тоа да се нанесе штета во и така кревкиот медиумски сектор во нашата земја.
Битката против дезинформации е сложен процес, не само во Македонија туку и општо во светот. Европската комисија веќе има план за превенција кој е добар основ за планирање на активности и во нашата земја, но од исклучителна важност е локалниот контекст и затоа е нужно новинарите и медиумите да имаат силна улога во креирањето на овие стратегии и да бидат однапред вклучени во процесот, велат од ЗНМ.