Зошто државата собира помалку пари од акцизи годинава
Објавено во: Финансии 29 Мај, 2019
Владата наплатила годинава за три месеци од акцизи вкупно 5.129 милиони денари, што е за дури 9,5 проценти помалку во споредба со истиот период од 2018 година. Податоците од Министерството за финансии покажуваат надолен тренд кај овие давачки кои до третиот месец учествуваат со над 19 отсто во вкупните даночни приходи.
Државата наплатува акцизи на повеќе акцизни стоки меѓу кои и на нафтените деривати, а дополнителните акцизи за дизелот требаше да ги зголемат приходите во буџетот. Од лани има повисоки акцизи за овој дериват, но ефектот не е значаен. Годинава, пак, барем во првите три месеци акцизните приходи се помали на вкупна основа.
Инаку акцизите за нафтените деривати станаа актуелни деновиве откако дел од диструбутерите ја повикаа државата да се откаже од дел од акцизниот приход за да се намали цената на бензините на пумпите. Вчера министерот за финансии Драган Тевдовски рече дека нема да има промени.
„Апсолутно нема никакви промени во регулативата. Значи тоа е што е во законите, рече Тевдовски.
Најголемиот дистрибутер Макпетрол објави дека со новата Методологија, со која Регулаторната комисија за енергетика од завчера повторно ги одредува цените на горивата, власта и натаму не сака да се откаже од дополнителните зафаќања кај акцизата. Макпетрол, пак, откако РКЕ вчера ги објави новите цени на горивата кои ќе важат наредните седум дена, соопшти дека согласно нивните пресметки, цените би требало да бидат пониски за по половина денар по литар кај сите деривати, од оние што ги утврдија регулаторите.