Зошто гладуваат луѓето во земјата на Ким Џонг Ун?
Објавено во: Свет 15 Мај, 2019
Луѓето во Северна Кореја се гладни, тврдат од Јужна Кореја.
Се нудат да им помогнат со храна.
Тие сметаат дека недостигот од храна во Северна Кореја сè уште е сериозен и дека на земјата ѝ треба странска помош.
Дел од медиумите тврдат дека цената на оризот на пазарите во Северна Кореја во последно време паѓа, што укажува дека земјата можеби не се соочува со толку сериозен недостиг од храна како што сметаат агенциите на ОН.
„Запознаени сме со процената на Светската програма за храна (ВФП) и Организацијата за храна и земјоделство (ФАО) како официјални и објективни показатели“, изјави портпаролот на јужнокорејското министерство за обединување на двете Кореи, Ли Санг-мин.
Според него, со оглед на природата на севернокорејскиот режим, се смета дека постојат многу ограничувања во реалната процена на состојбата со храната.
Месецов ВФП и ФАО објавија дека 10 милиони луѓе, или околу 40 отсто од населението во Северна Кореја, итно имаат потреба од храна.
Северна Кореја соопшти дека земјата е погодена со суша, најголема во последните 40 години.
Државната корејска централна новинска агенција КЦНА објави дека во земјата во просек паднале 54,4 милиметри дожд за првите пет месеци од оваа година, што е најниско ниво уште од 1982 година.
Сушата се очекува да трае до крајот на мај.