Зошто паркингот на Водно да поскапува во загадени денови?
Објавено во: Економија 11 Декември, 2018
Усвоениот предлог на градоначалникот на Скопје, Петре Шилегов, за двојно поскапување на паркинзите за време на денови со високо загадување на воздухот создава дилеми кај скопјани зошто мора така да биде и за оној на Водно.
Истиот наместо 100 денари по час како што беше досега, ќе чини 200 денари кога два дена по ред штетните честички во воздухот ќе бидат над 200 микрограми на кубен метар, иако местото е свртилиште за скопјани кои таму бараат инстантен спас од аерозагадувањето.
Тоа е најскапата сума во ценовникот, а единствено идентично ќе се наплатува и на улицата Максим Горки во строгиот центар на градот.
Во стандардните зони каде што цените се 35 и 45 денари на час, ќе се зголемат на 70, односно 90 денари, според одлуката донесена од советниците во Град Скопје на предлог на градоначалнникот Петре Шилегов.