Зошто се испратени сто возила на границата со Сирија?

Добивај вести на Viber

Турција ја зајакнува одбраната на границата со Сирија. 

Турција започнала да распоредува дополнителни сили во реоните долж границата со Сирија, кон кои се упатиле околу сто воени возила. Кон пограничните реони се движат конвои од тенкови, топови и автобуси, кои превезуваат припадници на специјалните армиски единици.

Турскиот претседател, Реџеп Таип Ердоган пред два дена соопшти дека најавената воена операција во сириските реони источно од реката Еуфрат против Силите за заштита на народот на сириските Курди, се одлага „за неколку месеци“.

Турција ќе ја продолжи борбата против џихадистичката група Исламска држава во Сирија откако САД ќе ги повлечат своите војници, изјави неодамна турскиот претседател Ердоган. 

Ердоган на 12 декември најави дека „за неколку дена“ Турција ќе започне воена операција против силите на сириските Курди во северна Сирија источно од Еуфарт, што наиде на остри реакции од страна на турските сојузници, кои започнаа притисоци врз Анкара да се откаже од офанзивата.

Анкара ги смета Силите за заштита на народот за сириски огранок на Курдската работничка партија (ПКК), која од 80-те години на минатиот век води вооружена борба за автономија на Курдите во Турција. ПКК е на листата на терористички организации на Турција, САД и ЕУ.

САД ги сметаат силите на сириските Курди за свој важен сојузник во борбата против џихадистичката група Исламска држава (ИД) и ги обучуваат нивните припадници и ги опремуваат со оружје и техника.

фото Ројтерс