Зошто треба да се крстиме само во Германија?
Објавено во: Економија 18 Јануари, 2019
Германија ја крепи македонската извозно ориентирана индустрија и е генератор на девизен прилив без кој нема да не биде. За периодот јануари-ноември 2018 година со Германија имаме трговски суфицит од 1,69 милијарди евра и извоз од 2,5 милијарди евра и тоа е речиси половина од целиот наш извоз! Нашата дијагноза е : преголема зависност од германската економија, но во случајов друго нема.
Македонската економија за првите 11 месеци годинава извезла стоки и услуги во вредност од 2,5 милијарди евра во најсилната европска економија сојузна република Германија. Воедно Германија е нашиот најголем трговски партнер со кој разменуваме стоки и услуги во вкупна вредност од 3,32 милијарди евра. Геерманија е земја со која имаме суфицит во трговската размена и тој изнесува 1,69 милијарди евра. За нашата извозно ориентирана економија Германија е најважниот стратешки партнер затоа што конзумира 45,6 отсто од нашиот вкупен извоз, покажуваат официјалните податоци за периодот јануари-ноември 2018 година, достапни на веб страницата на Државниот Завод за статистика. Замислете што ќе и се случи на нашата економија ако Германија реши да стави вето?!
Само со 4 од најголемите 20 трговски партнери имаме суфицит!
Македонската економија има 20 најголеми трговски партнери и дури со 16 од нив имаме негатива во трговската размена што значи дека увезвуваме повеќе одошто извезуваме. Најголем партнер по Германија ни е Косово каде имаме извоз на стоки и услуги вреден 203,9 милиони евра,а увозот е нешто над 27 милиони евра. Во плус сме и при размената со Австрија каде изнесуваме стоки и услуги вредни 133,7 милиони евра, а внесуваме стоки и услуги за 120,5 милиони евра и Шпанија со која сме во плус од околу 16 милиони евра зашто увозот е 76,6 милиони евра, а извозот е 92,4 милиони евра.
Кој не работи како „бавча“?
Најголем дефицит имаме со Велика Британија. Негативата во трговската размена е 568,6 милиони евра за 11 месеци лани. Грците исто така добро не „работат“. Дефицитот е 424,7 милиони евра, а увозот од таму надминува 601 милиони евра. Кина е на третата позиција на најголеми генератори на трговски дефицит и тој изнесува 355 милиони евра. Кусокот со Србија е 258,8 милиони евра, а со Италија е 224,3 милиони евра. Македонија има трговски дефицит со 16 од 20 најголеми трговски партнери.
Целиот извештај е достапен на следниот линк http://www.stat.gov.mk/pdf/2019/7.1.19.01.pdf
Р.Ф.