Царовска: Не размислуваме за зголемување на старосната граница за пензија

Добивај вести на Viber

Министерката за труд и социјална политика Мила Царовска откако ги доби препораките од ММФ за зголемување на старосната граница за пензионирање посочи дека владата воопшто не размислува на таков чекор, туку со други мерки ќе го консолидира Фондот за пензиско и инвалидско осигурување кој најмногу го троши државниот буџет.

- Во Македонија постојат други чекори што треба да се преземат и за тоа ќе излеземе кога ќе имаме детален план. За да може да се стабилизира Фондот, прво нешто што преземавме е дека го почитуваме законското решение за зголемување на пензиите и усогласување, а не ад хок паушални зголемувања што не се основани - изјави Царовска.

Таа нагласи дека е многу важно дека Владата најодговорно тврди дека ќе се грижи за достоинствена пензија на сегашните пензионери, но и за достоинствена пензија на идните пензионери што е дискусија што заеднички ќе биде отворена.

- Не е единствено решение зголемување на старосната граница. Тоа е последното решение што треба да се преземе, навистина во Македонија има други работи што треба да се надминат во системот. Тоа е можеби идно долгорочно, но не размислуваме за тоа, сега има и други мерки што ќе ги преземеме и ќе бидат јавно објавени, изјави Царовска.