Како Османи ја коментира изјавата на Макрон за „Европа во повеќе брзини“?
Објавено во: Македонија 30 Август, 2023
За изјавата на францускиот претседател Емануел Макрон за „Европа во повеќе брзини“, министерот за надворешни работи, Бујар Османи рече дека неговата идеја е разјаснета во Блед. Детали даде министерката за европски прашања Лоренс Бун и Александар Адам, негов советник и креатор на францускиот предлог.
„И тие кажаа дека Макрон зборувал за брзини во смисла дека нема да влезат сите наеднаш, туку во различни брзини во зависност кој кога ќе биде подготвен, а не Европа во слоеви во смисла привилегирани и помалку привилегирани бидејќи ние нема да прифатиме ништо помалку од полноправно членство во ЕУ. Со тоа што знаете дека ние го промовираме концептот повеќе интеграција пред членство што значи кога веќе 2030 ни е фиксна, дајте да станеме дел од Унијата и пред членство, односно како исполнуваме едно поглавје стануваме дел од таа политика на Унијата. Влегуваме во единствениот пазар, имаме пристап до фондовите. И пред самото членство ние веќе ќе бидеме во Унија, единствено што нема да имаме до тогаш е правото на глас кое што ќе го добиеме на денот на членство“, вели Османи.
Францускиот претседател Емануел Макрон, на годишниот состанок во Париз со неговите амбасадори, всушност испрати пораки и до Европската Унија и до земјите-кандидати. Макрон сугерира дека блокот, всушност ЕУ, „треба да биде храбар за да најде начини за интегрирање на земјите кандидати, меѓу кои се Молдавија и Украина“, но тоа да не биде на досегашниот начин – со полноправно членство. Макрон вели дека ЕУ треба да се реформира доколку сака да интегрира нови нации.