Какви промени носи законот за извршување и што тоа ќе значи за должниците

Добивај вести на Viber

Од почетокот на 2017-та ќе стапат на сила измените во законот за извршување кој треба да донесе поволности за самите должници бидејќи една од најважните и најпотребните промени е испраќање на известување до нив пред да им биде блокирана сметката за наплата на долгот.

Според Зоран Петрески претседателот на Комората на извршители на Македонија (КИРМ), новиот закон ќе донесе бројни предности, посебно за граѓаните кои припаѓаат на ранливите категории.

„Во новиот закон се предвидува дека за неплатени комунални сметки извршителот не смее да блокира без претходно да го извести граѓанинот дека постои некој долг и да побара од него да предложи начин на кој ќе се сервсира долгот. Исто така, воведувањето на вонсудската наплата е апсолутно поволен момент кој ќе овозможи пред почетокот на каква било постапка, граѓанинот да го сервисира својот долг без поголеми трошоци. Додека третиот и најважен момент е електронското поврзување на извршителите со сите институции од каде ќе се добиваат бесплатни податоци од сите институции со што ќе се намалат трошоците“, изјави Петрески на годишната конференција што се одржува во Пехчево.

В првите девет месеци извршителите во Македонија примиле 134.740 барања за извршување, реализирале само 28,40% или 38.266, а вкупниот износ на наплата од извршување е 75.715.471 евра што е 2 милиони евра помалку од лани.