Лавров: САД реши Македонија да влезе во НАТО, секој договор со Грција ќе го поддржиме

Добивај вести на Viber

Русија за прв пат по подолго време излезе со свој став за спорот меѓу Македонија и Грција велејќи преку министерот за надворешни работи Сергеј Лавров дека секој договор кој ќе биде постигнат ќе биде прифатлив за нив без да се мешаат.

„Во однос на ревитализирањето на напорите за решавање на проблемот за официјалното име на Македонија: овие напори беа долго во полузаспана состојба и се интензивираа дури тогаш, кога САД одлучија, дека Македонија треба да биде во НАТО...Суштината на она што се случува се надевам дека е разбирлива за сите: тука не станува збор за земање предвид на заедничките и специфичните карактеристики на два блиски народа, туку за тоа дека една од овие земји нужно мора да стане членка на НАТО ", рече Лавров. 

На годишната конференција за новинари, рускиот министер за надворешни работи истакна дека спорот за името меѓу Македонија и Грција долго време бил во „полузаспана ситуација“ и оти сега заживеал дури откако САД одлучиле Македонија да влезе во НАТО. Лавров потсети дека Грција е веќе членка на НАТО и оти не ѝ е неопходно да прави отстапки, туку дека тоа треба да го стори Македонија, која се надева дека ќе влезе во Алијансата, пренесуваат руските новински агенции РИА Новости и ТАСС.

Одговарајќи на прашањето на еден грчки новинар, дали Русија ќе ја признае Македонија под ново име, ако тоа се прифати од двете страни, министерот одговори: „Кое било решение што ќе го изнајдат Македонија и Грција и кое ќе биде поткрепено во македонскиот устав, ние најверојатно ќе го прифатиме“, рече Лавров.