Пролетните температури ќе траат кратко - какво време се очекува за Велигден?
Објавено во: Македонија 09 Април, 2023
Метеорологот Славчо Попоски вели дека до крајот на денешниот ден во поголемиот дел од Македонија ќе има нови врнежи од дожд, додека на планините и тоа особено во западните и во северозападните предели со надморска височина од над 1000 м.н.в ќе има врнежи од снег.
Локално врнежите ќе бидат поинтензивни (над 20 л/м2 воден талог). На планините ќе се формира нова снежна покривка.
„Во Скопје исто така ќе има повремени врнежи од дожд. Во следниот период ќе дува слаб до умерен, а Долж Повардарието и во источните предели повремено засилен ветер од северен и од северозападен правец. Повремен локален дожд и снег на планините ќе има и утре, додека од вторник следува краткотрајна стабилизација на времето и вистинска пролет со голем пораст на температурите и истите речиси насекаде ќе надминуваат 15 степени, а во централнит и во југоисточните предели истите ќе се искачуваат и над 20 степени“, вели Попоски.
Барем одсега гледано, за најголемиот Христијански празник, Воскресение Христово – Велигден, повторно се очекува врнежливо време и со пониски температури на воздухот. Сепак промени во нумеричките модели се уште можни. Детална и официјална анализа за тоа какво време ќе имаме за Велигден следува во текот на новата седмица која е пред нас.