Русија и САД пак се скараа луто за Сирија
Свиканот итен состанок на Советот за безбедност на ОН наместо да побара излез од ситуацијата стана тешка вербална борба меѓу Русија и Западот.
Објавено во: Свет 26 Септември, 2016
Лута расправија избувна во Советот за безбедност на ОН поради тековните бомбардирања над Алепо, кои за неколку дена зедоа над 200 жртви меѓу цивилното население во сирискиот град, пренесоа светските агенции.
Бројот на повредените се приближува до 400, а луѓето се оставени без лекови и храна поради неможноста за испорака на хуманитарна помош.
Овој итен состанок на Советот за безбедност на ОН, наместо да се побара излез од ситуацијата, стана тешка вербална борба меѓу Русија и Западот.
Амбасадорот на САД во ОН Саманта Пауер ја обвини Русија за "варварство" поради воздушните напади над Алепо.
„Она што Русија всушност го поддржува во градот, не е борба против тероризмот, туку варварство“, рече таа.
Претставниците на Велика Британија и Франција ја нападнаа Москва дека ја поддржува воената офанзива на својот сојузник - сирискиот претседател Башар Асад.
Кога сирискиот амбасадор беше повикан да говори, амбасадорите на трите западни земји ја напуштија салата во знак на протест.
Од своја страна, постојаниот претставник на Русија во ОН Виталиј Чуркин потсети дека САД уште не дале објаснувања за загинувањето на над сто цивили во бомбардираниот град Манбидж.
„Зедовме под внимание неприфатлив тон и реторика на претставниците на САД и Велика Британија, кои можат да му наштетат на нашите односи“, коментира и портпаролот на претседателот Путин, Дмитриј Песков.