ВМРО ДПМНЕ го повикува Заев да отстапи од платформата, за возврат му ветуваат поддршка за Влада

Добивај вести на Viber

Партијата на Никола Груевски уште еднаш го повика опозицискиот ривал Зоран Заев да не ја прифати платформата на ДУИ .

ВМРО ДПМНЕ ја повика СДСМ да отстапи од политиките кои според нив се спротивни на државните и национални интереси а за возврат со своите 51 пратеник ќе ги поддржат да формираат Влада.

„ВМРО-ДПМНЕ јасно ја соопшти својата позиција уште пред да влезе во преговори за формирање на идната владина коалиција, а таа гласеше „Влада да, но не по секоја цена“.

ВМРО-ДПМНЕ одби да разговара под уцена за прифаќање на платформата изготвена и потпишана во Тирана чија крајна цел е редефинирање на Република Македонија и нејзино трансформирање од мултиетничка во бинационална држава.

СДСМ е уценет само заради тоа што изгуби на изборите, не ја доби поддршката на граѓаните и не освои мнозинство гласови за да формира влада. Сега СДСМ е доведен до ѕид заради патолошката желба на Зоран Заев да биде премиер по секоја цена“, соопштуваат од партијата на екс премиерот во утринското соопштение до јавноста.

Оттаму посочуваат дека СДСМ  прифаќа и гледа позитивно на платформата од Тирана.

„Затоа СДСМ се согласува на официјализирање на албанскиот јазик и воведување на двојазичност на цела територија. Затоа СДСМ се согласува на менување на банкнотите и униформите. Целата јавност деновиве беше сведок дека СДСМ ги прифатил и останатите сегменти од платформата кои подразбираат носење на резолуција за прогласување на геноцид врз албанците.

Сите овие отстапки на СДСМ се исклучително опасни по иднината на Република Македонија. Цената на уцените, на крај нема да ја плати само Заев и СДСМ, туку Република Македонија“, реагираат од ВМРО ДПМНЕ.

Според владеачката партија само брзи вонредни избори се спас од оваа состојба и Заев јавно да се откаже  од платформата.