Зошто цената на акцијата на „Топлификација“ порасна за 64 отсто за два и пол месеци?

Добивај вести на Viber

Компанијата за првите шест месеци има „ќумур“ резултати. Добивката паднала за 85 отсто, приходите од продажба се пониски за речиси 40 отсто, а долгорочниот долг од 13,8 милиони евра виси како камен околувратник. Зошто тогаш вредноста на акцијата за два и пол месеци порасна за 64отсто? Мириса ли на превземање или смена на вечниот Хаџимишев?

„Топлификација“ во првите шест месеци годинава изгубила 39 отсто од приходите и тие изнесуваат 50 милиони денари, а во споредба со лани се пониски за 32,5 милиони денари. Добивката на половина од годинава изнесува одвај 20.000 евра и таа е за 85 отсто пониска од лани. Оваа компанија, која порано беше јавен сервис за топлинска енергија во главниот глад, а сега е само закуподавач на топланите на БЕГ, во првата половина од годинава има обврски од 20 милиони евра, а најтежок камен околувратник е долгорочниот кредитен долг од 13,8 милиони евра. Зошто во вакви услови во послениов период растеше цената на акцијата на „Топлификација“? 

Нема рационален одговор кој би бил резултат на финансиските податоци. Компанијата има огромни обврски кои надминуваат 20 милиони евра. Таа заглави многу пари во когенеративната топлана ТЕ-ТО и за тоа има голема кредитна изложеност кон домашна банка. Целиот имот на „Топлификација“ е под залог. Таа нема бизнис затоа што остана само закуподавач на опрема и средства на друга фирма која го работи бизнисот.

 И инвестицијата во ТЕ-ТО се покажа како големо промашување, барем од оваа сегашна временска дистанца. Затоа што ТЕ-ТО не може да го најде своето место под сонцето. Можеби искра надеж дава корекцијата на преносната тарифа што ја одобри Регулаторната комисија за енергетика за големи количества за пренос на природен гас. Тоа веднаш упатува на ТЕ-ТО и тоа што ќе му ја олесни работата зашто ќе му ги намали давачките. Сепак ТЕ-ТО има многу долгови, а за тоа веќе пишувавме. 

Да потенцираме за да не се заборави: „Топлификација“ има побарувања 1,34 милијарди денари (околу 22 милиони евра) и тоа има врска со нејзиното вложување во ТЕ-ТО. Можна ли е наплата на тие пари? Или поточно можна ли е наплата ако се промени актуелното раководство и соодносот на силите во акционерската структура? Дали некој актуелен или иден акционер во ТЕ-ТО би го исплатил долгот кон „Топлификација“? Тогаш ќе настане молскавична промена во вредноста на акцијата на „Топлификација“!

Што покажуваат билансите?

Билансите на „Топлификација“ покажуваат дека компанијата за половина година дала речиси половина милион евра за камати! Тоа е повеќе од 60 отсто од нејзините приходи од продажба за истиот период. Рака на срце износот платен за камати е за 37 отсто помал од првата половина во 2015 година, но сепак тоа се многу пари и веројатно се работи за банкарски репрограм на долг, зашто се видело дека нема што да се загуби...

Зошто тогаш драстично порасна вредноста на акцијата на „Топлификација“? Дали е само шпекулација на итри трејдери? Или има некоја информација. Зошто се случи токму во јули, на сред лето кога удира летаргијата на нашата берза. На 29 јуни се тргувани акции на „Топлификација“ по просечна цена од 525 денари, а на 14 септември цената надминува 860 денари за акција. Во овој период се истргувани над 3.600 акции со право на глас, но тоа е помалку од 1 отсто од сите акции. Во овој период имаше спорно акционерско собрание во „Топлификација“ заради што акцијата беше симната од берзанска котација и ставена на тргување на слободниот пазар. 

Моментално во „Топлификација“ најголем поединечен акционер е оф-шор компанија „Битар Холдинг“ што поседува над 16 отсто од акциите. Но клучни за одлучување се многубројните раскарани, закрвени домашни акционери – физички лица. Тие не си ја знаат силата, а поседуваат околу 76 отсто од акциите, а ги има околу 2.500 лица. Кој да ги обедини? 

Р.Ф.