Зошто македонскиот буџет е хронично во црвено?

Добивај вести на Viber

Дали е поразително тоа што осум месеци расходите на буџетот се поголеми од приходите? Само еден месец приходите од даноци, акцизи и придонеси се повисоки од расходите, а еден месец колку се собрани толку се и потрошени.

Приходите во централниот буџет биле повисоки од расходите само во еден од десет месеци годинава, покажуваат официјалните податоци на Министерството за финансии објавени на нивната интернет страница. Во периодот јануари – октомври единствено во март централниот буџетне бил во црвено и тогаш приходите биле за една милијарда денари поголеми од расходите, покажуваат официјалните податоци.

Вкупниот дефицит (разликата меѓу расходите и приходите) е 11,3 милијарди денари односно 168,5 милиони евра. За десет месеци приходите на државата од даноци, акцизи, придонеси, капитални приходи, неданочни приходи, донации изнесуваат 146,4 милијарди денари и нивото на реализација е 79,2 отсто. Вкупните расходи се 157,7 милијарди денари односно реализацијата е 77,6 отсто што е пониско ниво на реализација во однос на приходната страна на буџетот. Но како и да е тоа нема никакво или има само минорно и незабележливо влијание врз балансот на приходи и трошења.

Народски кажано, за нашиот буџет годинава да биде балансиран, треба за трошиме 12 месеци, а да плаќаме даноци 13 месеци.

Од расположливите податоци се гледа дека најмогу приходи во буџетот се собрале во март годинава и тие изнесуваат 16,8 милијарди денари. На второ место на листата се наоѓаат октомври и мај со по 15,4 милијарди денари. Наспроти нив на расходната страна најмногу одливи имало во мај и тие изнесуваат 17,1 милијарди денари, втор е март со 16,7 милијарди денари, а трет е јуни со 16,2 милијарди денари.

Во структурата на приходите апсолутно доминираат даноците (ДДВ, персоналец и добивка), придонесите и акцизата. Во структурата на расходите најголема ставка се социјалните трансфери кои се околу 60 отсто од сите расходи.