Демонстрантот што фрли молотов коктел на Собранието доби една година затвор
Објавено во: Македонија 27 Јули, 2022
Кривичниот суд го осуди 26-годишниот скопјанец Александар Филиповиќ на едногодишна затворска казна по призната вина, откако за време на протестите против Францускиот предлог фрли молотов коктел кон кордонот полицајци пред Собранието.
19-годишниот скопјанец Јане Смилевски, обвинет дека го подготвувал стакленото шише со бензин и ткаенина, доби условна казна. Двајцата беа обвинети за кривичното дело предизвикување општа опасност.
„За време на одржување на јавниот собир на граѓани, обвинетите учествувале во толпа и со општо опасно дејствие предизвикале значителна опасност за животот и телото на луѓето на место каде што биле собрани голем број на луѓе. Обвинетиот Смилевски подготвил молотов коктел во стаклено шише, кое претходно од Филиповиќ било наполнето со бензин. Му ставил парче ткаенина, го подал на Филиповиќ, кој како опасно средство го фрлил према поставениот кордон од полициски службеници пред Собранието“, посочи скопското Обвинителство.