Гром удрил во рускиот авион кој однесе во смрт четириесетина луѓе

Добивај вести на Viber

Рускиот авион кој доживеа несреќа бил „погоден од гром“, а сите преживеани се евакуирани за 55 секунди.

Патниците и екипажот во авионот кој мораше да изврши принудно слетување на московскиот аеродром, велат дека бил погоден од гром непосредно пред да се урне.

Преживеаните раскажуваа како избегале од авионот на „Аерофлот“, кој букна во пламен при слетувањето на аеродромот Шереметјево. Четириесет и еден од 78-те луѓе во авионот загинаа во несреќата.

Меѓу загинатите се и две деца и стјуардеса. Вршителот на должноста гувернер на Мурманск, Андреј Чибис, на Фејсбук објави дека 26 од жртвите биле од неговиот регион.

Модерните авиони се изградени да издржат удар на гром, а рускиот национален авиопревозник само рече дека авионот се вратил на аеродромот од „технички причини“.

Меѓутоа, патниците рекоа дека авионот, кој бил упатен кон северниот руски град Мурманск, бил погоден веднаш по полетувањето.

Неколкумина од петте члена на екипажот исто така изјавија дека поради молњи се загубила комуникацијата со контролата на летање.

На драматичното видео од аеродромските камери се виде дека авионот слетува многу нестабилно, отскокнува на пистата и букнува во пламен.

Таканаречените црни кутии на авионот кои ги снимаат податоците за летот и разговорите во пилотската кабина - наводно, се пронајдени и предадени на истражителите.