Кривична пријава за „Летс Травел“, агенцијата што организираше одмор на Северен Кипар

Добивај вести на Viber

Управителот Ф.С. (26) и сопственикот Х.Ч. (42)  на охридската туристичка агенција „Летс Травел“ заработија кривични пријави поради тоа што во јули и август годинава, довеле во заблуда седум лица од Скопје, лажно ветувајќи им дека ќе им организираат аранжман за летување во Северен Кипар со што успеале да ги наведат да извршат уплата на парични средства во вкупен износ од 365.860 денари, соопшти денеска МВР. Оштетените лица откако склучиле договори за летување во Северен Кипар и ги уплатиле парите на сметка на агенцијата, на само неколку дена пред тргнување на одмор им било кажано дека патувањето нема да се реализира и им била побарана трансакциска сметка за да им бидат вратени парите назад, што не се случило. Освен  седумината измамени скопјани, до Државниот пазарен инспекторат доставени се пријави на уште од 16 оштетени лица од скопската подружница на агенцијата „Летс Травел“,  кои уплатиле аранжмани за летување во Северен Кипар во вкупен износ од 384.773 денари. Притоа полицијата утврдила дека уплатените средства од оштетените лица на денарската сметка на туристичката агенција преку свивтови од девизната сметка се префрлени на сметката на фирмата „Ле туристик Сервислер“ од Турција сопственост на горенаведениот Х.Ч. (42).