Марко Агуириано: Ќе ја ублажиме штетата со Северна Македонија и Албанија
Објавено во: Свет 28 Октомври, 2019
Марко Агуириано, државниот секретар на Шпанија за Европа, кој ќе му реферира на Жозеп Борел, во интервју за Ди Велт вели дека ЕУ ќе се обиде да ја ублажи штетата на Западен Балкан со, како што вели тој, стратешката грешка да не се отпочнат преговори со Северна Македонија и Албанија.
Ди Велт: Може да се потврди дека за Европа веќе е предоцна да даде предлог за северна Сирија.
- Во последниве години, ЕУ главно ја користеше својата мека моќ како актер во надворешната политика, најмногу преку трговската политика. Но сега ЕУ е свесна дека ние нужно мора да дејствуваме како силно единство и вистински актер за судбината на нашата планета кога станува збор за надворешната политика, за војната и мирот и зачувувањето на човековите права Отсега, треба да се вклучиме сè повеќе во надворешната политика, во спротивно другите ќе ни ги наметнат своите стратегии и нивните цели.
Во свет каде што еден од нашите најблиски сојузници во одбраната, САД, ни кажува дека треба да се вклучиме повеќе, тоа е неопходно. Во исто време Русија се обидува да го прошири своето влијание - а исто така и Кина. Во светло на сето ова, јас исто така верувам дека одлуката за одложување на преговорите за пристапување со Северна Македонија и Албанија не беше стратешки најпаметна одлука.
Ди Велт: Колку е оштетен односот со Северна Македонија и Албанија?
- Се надевам не премногу. Ние се обидуваме да испратиме силна порака и да ја ублажиме штетата. Ако ние Европејците не станеме политички водечка сила, за неколку години, како што вели Жан Клод - Јункер, Европа ќе биде фантастично место за туристите, со култура, одличен изглед, литература и музеи - но нема да има влијание на нашата планета. Или ЕУ сега ќе биде активна или ние ќе бидеме жртви на нашата неактивност. Убеден сум во тоа. Постои ризик дека нашите сојузници ќе бидат уморни од нас, бидејќи сметаат дека не ги исполнуваме нашите ветувања.
Ди Велт : На кои теми Шпанскиот министер за надворешни работи ќе се фокусира како иден претставник за надворешна политика на ЕУ во Брисел?
- Сирија, Либија и Западен Балкан веројатно ќе имаат најголем приоритет. Мораме да го поврземе Западен Балкан со ЕУ и да биде стабилен. Покрај очигледните причини за ставање на дневен ред на Либија и Сирија, надворешната политика кон двете земји природно има за цел да го реши проблемот со бегалците.