Мијалков: Полека умираме со проблемите за нашите деца со посебни потреби

Добивај вести на Viber

“Состојбата на семејствата  на деца со посебни потреби е крајно критична бидејки се соочуваме со проблеми во сите сфери од животот. Ние не живееме со проблемите, ние секојдневно умираме од проблемите и предвреме остаруваме и се разболуваме, гледајки ги нашите деца за кои и покрај толкава борба сеуште не сме успеале да ги обезбедиме понекогаш и најосновните потреби” - вели за Фактор,  Зоран Мијалков претседател на Здружението “Сплотени срца”  и член на Иницијативата 5 до 12.

Родителите на децата  со посебни потреби се  разочарани бидејќи општина Штип го скроила  буџетот за наредната година тежок 15 милиони евра,  но не предвидела пари  за нивните проекти  со кои велат планирале изградба на рехабилитациски центар за грижа, нега и едукација на лицата со посебни потреби. Дополнително,  засегнатите родители планирале  обука на лица кои ќе помагаат околу грижата за децата со посебни потреби, но наместо нив, реагираат дека тоа и понатаму ќе мора да го прават само родителите.

“На ова прашање би било најдобро да одговори советот на Општина Штип, бидејки советот го гласа Буџетот. Инаку пред локалните избори во Штип организиравме дебата на која ги поканивме и присуствуваа кандидатите за советници и градоначалник и истите слушнаа кои се нашите барања и ветија дека доколку бидат избрани ќе се заложат за нивна реализација во нивниот мандат”- вели Зоран Мијалков.

Според него лицата со посебни потреби живеат од грижата на нивните блиски. Институционално помошта е мала, а потребите големи. Терапијата за лекување како што вели  е скапа и за многумина тешко достапна, а фондот често  не ги покрива трошоците, па мораат сами да се снаоѓаат како знаат и умеат.

“Нема рана дијагностика, биомедицински и суплементарни терапии, центрите кои ги има се со недоволно обучен кадар кој би работел по светски признати терапии со децата. Нема сместувачки капацитети за возрасните лица со посебни потреби”- додава Мијалков.

Дополнителен проблем  за  кој стравуваат родителите  на овие деца е недоволната законска заштита во случај на смрт на  родителите и грижата која ќе треба да ја преземат институциите, општината или државата.

“Што ќе биде со децата после нашата  смрт и дополнителен проблем бидејќи нема законско решение  за нашиот имот да биде во целост искористен за нашите деца.

Вкупно 5 месеци кампувавме по три дена  пред Собранието и се формира Иницијативата 5до12 во која влеговме здруженија од цела Македонија и од сите категории на попреченост. Доставивме барања до Владата и министерствата, барајки законски измени, законски дополнувања и нови закони со кои би се решиле наталожените проблеми на децата и возрасните со посебни потреби. Тоа се системски решенија со кои би ја испочитувале повелбата на Обединетите нации и потпишаните конвенции од Европската унија за децата и возрасните со посебни потреби. Се уште во тој поглед нема некои поместувања , освен некои поместувања од министерството за труд и социјална политика бидејки  само ресорната министерка најмногу контактираше со нас”- вели Мијалков.

Дел од барањата кои неколкупати ги доставија до надлежните  се да се обезбеди грижа за децата со посебни потреби по смртта на родителите, квалитетни здравствени испитувања, соодветна терапија за лекување и олеснување на животот, здравствено осигурување по наполнети 26 години. За добар дел од нив велат е потребна сериозна помош од локалната и централната власт.

Од општина Штип велат дека ќе ги искористат сите ингеренции да се решат проблемите на лицата со аутизам и нивните родители. Во буџетската каса  уверуваат  дека  има повеќе ставки за обезбедување на финансиски средства за граѓаните помеѓу кои и за ова здружение.