Радев вели дека не може Македонија нив да им поставува ултиматуми
Објавено во: Македонија 09 Мај, 2022
Бугарскиот претседател Румен Радев реагира на изјавата на македонскиот министер за надворешни работи, Бујар Османи дека до јуни има можност да се развијат односите меѓу РСМ и Бугарија.
Според него, крајно несоодветно и нездраво е Северна Македонија да поставува ултиматуми.
„Крајно е несоодветно и нездраво да се зборува за Бугарите и да се поставуваат некои ултиматуми. Притисокот беше уште поголем минатата година. Јас и преодната влада го продолживме овој притисок со два последователни совети за проширување. „Многу добро ги објаснивме позициите на Бугарија и тие се прифатени. Само треба да се бранат. Станува збор за човекови права, копенхашки критериуми, говор на омраза. Тоа се работи кои не се компатибилни со европските принципи и вредности“, рече тој.
Бугарската министерка за надворешни работи, Теодора Генчовска на средбата со својот австриски колега Александер Шаленберг изјавила дека Софија вложила значителни напори за позитивни билатерални односи со Скопје изминатиов период.
„Ќе продолжиме да работиме на градење на вистински добрососедски односи со Република Северна Македонија. Сепак, тие се можни само со заеднички напори. Од Скопје очекуваме конкретни дејствија и гаранции за трајно и неповратно спроведување на Договорот од 2017 година, како и гарантирање на правата на граѓаните на Република Северна Македонија со бугарска самосвест“, рече Генчовска.
Претходно, од македонската дипломатија информираа дека наредниве недели се клучни за постигнување решение со Софија.
До крајот на овој месец повторно ќе се одржи заедничка меѓувладина седница со кабинетот на бугарскиот премиер Кирил Петков, но овој пат во Скопје. Албанија сака раздвојување на патот кон ЕУ, и како што велат тамошните власти, не сакаат да бидат заложници на соседскиот спор.