Добивај вести на Viber
До 2020 година Софија треба целосно да си го смени изгледот. Такви се барем се плановите на градското собрание, соопштува телевизијата БТВ. Најголемите градежни активности ќе бидат изведени на 320 илјади квадратни метри, на потегот помеѓу ЦУМ, НДК и Софискиот универзитет. Идеи и проекти за тоа како ќе изгледа градот уште се собираат, а пари ќе се бараат и преку европските проекти, јавуваат бугарските медиуми.
Измени ќе бидат направени и кај Перловска река, по должината на булеварот Евлоги Георгиев, со што потегот ќе биде пренаменет за пешаци и за велосипедисти, изјави главниот архитект на Софија, Петар Диков. Во плановите за новите промени, кои треба да се направат до 2020-та година влегува и плоштадот пред царската палата по булеварот „Цар ослободител", кадешто се работи на дислоцирање на трамвајот. Главниот архитект се надева дека до 2014-та година булеварот "Гроф Игнатиев" ќе добие нов изглед и ќе стане позната трговска улица. По нејзината реконструкцијата, планот е просторот да се претвори во шопинг центар на отворено.
Засега нема предвидено поставување нови споменици, а целта на новите проекти е да се уреди просторот и да се зголеми квалитетот на живот во бугарската метропола.