Стевче Јакимовски како во шпиунски филм - УБК знаела дека ќе упадне Катица
Објавено во: Македонија 21 Октомври, 2016
Стевче Јакимовски, некогашниот одметник од СДСМ, а сега поддржувач на политиките на власта, во гостувањето на ТВ Нова даде исказ како од некој крими шпиунски филм од 80-тите дека УБК се толку добри агенти што знаеле дека Катица Јанева ќе им „упадне“.
Зборот „упадне“ навистина „упаѓа“ во очи бидејќи СЈО за истражните дејствија кои ги вршеше во УБК и кои всушност се уште траат доби валидна судска одлука. Ако тврдењата на Стевче Јакимовски се навистина точни, дали тоа значи дека УБК има свои шпиуни во судот, дали тие ги шпиунираат и следат судиите и истражителите и обвинителите на СЈО!?
„Смешно е што Катица и тие што ѝ веруваат мислат дека Управата за безбедност и контраразузнавање не знаеле дека дека таа ќе упадне внатре, ако е таква УБК не би требало ни да постои“, посочи Стевче Јакимовски во емисијата Аргументи.
Тој додаде дека Јанева прави парада и врши штета врз целиот процес.
„Јас одговорно тврдам дека Управата за безбедност и контраразузнавање сто проценти знаеле и кога ќе дојде Јанева и какви и се намерите. Така што непотребно прави парада, го бламира безбедносниот систем на Република Македонија кој што одлично функционира, па затоа мислам дека само поголема штета ќе му направи и на целиот процес а и на СДСМ“, заклучи Јакимовски.