Кејт Брнз: Бугарското вето предизвика сомнеж кај граѓаните во кредибилитетот на ЕУ, спорот мора да се решава билатерално
Објавено во: Македонија 20 Февруари, 2021
Aмериканската амбасадорка во Скопје Кејт Брнз, во
синоќешното гостување во емисијата на Канал 5, „Само интервју“ посочи дека САД
се разочарани поради одлуката на Бугарија за вето на почетокот на преговорите
со Европската Унија. Таа истовремено нагласи дека до решение мора да се дојде преку билатерален
дијалог.
-Процесот кон ЕУ и сите билатерални прашања треба да се решат надвор од пристапните преговори. Ние го гледаме како позитивен знак тоа што Севрна Македонија и Бугарија продолжуваат да расправаат за билатералните прашања, да се стават надвор од процесот, со цел напредок во тој поглед, истакна американската амбасадорка во емисијата.
Брнз смета дека актуелната позиција на Бугарија кон Македонија нанесува штета на повеќе нивоа, но главно е тоа дека предизвика и сомнеж кај граѓаните во кредибилитетот на ЕУ и нејзината посветеност кон проширувањето.
-Мислам дека тоа ја отвори вратата за дезинформации. Затоа е важно тоа да не се дозволи. Поважно е да се има на ум дека, што и да се случи, најважните односи за земјава се со ЕУ и со НАТО и ништо нема да ги замени, истакна Брнз.
Сепак, како што нагласи, има доверба во владата дека ќе успее да дојде до договор со Бугарија.
-Северна Македонија има докази дека се справувала со спорни прашања со соседите и ги разрешувала конструктивно, па и понатаму ќе се залагаме, ќе се бориме и ќе ја поддржуваме Северна Македонија да ги започне преговорите и билатералните прашања да останат надвор од преговорите, рече Брнз.