Зошто Садик Кан не сака Трамп да ја посети Британија?

Добивај вести на Viber

Градоначалникот на Лондон Садик Кан, денеска се приклучи на повикот за откажување на државната посета на претседателот на САД, Доналд Трамп во Велика Британија. 

Причина е  споделувањето на твитовите на британската десничарска група, пренесе Ројтерс.

Кан вели дека Трамп промовира „злобна, екстремистичка група“ и дека неговата официјална посета на Велика Британија „не би била добредојдена“.

Трамп на Твитер ги сподели антимуслиманските снимки од екстремно десничарската група Британија на прво место, што наиде на осуда во Велика Британија. Портпаролот на премиерката, Тереза Меј изјави дека Трамп погрешил кога ги споделил снимките.

Потоа Трамп ја повика Меј да се фокусира на „деструктивниот радикален исламски тероризам што се одвива во Обединетото кралство“, а не на него.

Тереза Меј се обидува да оствари блиска врска со Трамп, кого го посети во Вашингтон неколку дена по инаугурацијата во јануари и му изнесе понуда за официјална посета чиј домаќин би била кралицата Елизабета Втора.

И покрај повиците за откажување на посетата, сепак таа  се планира иако „времето и прецизните детали сѐ уште не се утврдени“.